به میدان رفتن امام حسین با طفل بی زبان
روز پر غوغای عاشورا دیار عشقیده مستیدی مولا حسینده کارزار عشقیده
تتردردی رزمگاهی نعره تکبیریدن واهمه ائتمزدی اوخدان نیزه دن شمشیریدن
پنجه سی اژدر شکار و ذوالجناحی تندرو تیغ غیرت دن سر اشراری ایلردی درو
باده نوش جام عشق ذات خلاق صمد تا توشردی مشکله سسلردی یا زهرا مدد
جهد ائدردی اعتلای عهد خوش فرجامیده فکری قالمشدی او سلطانون ولی اخیامیده
نینوا بازارینون تشنه جگر سوداگری ناگهان یاده سالوب حال رباب و اصغری
روح سرمستی دوشوبدور غفلتا تاب و تبه مرکبه هی وردی گلدی خیمه گاه زینبه
سسلدی ای همدم و همدرد و همرازیم باجی بوشدی میخانه هانی شش ماهه سربازیم باجی
لحظه لر حساس دی غملر ملازمدی منه غنچه عمری ربابون ایندی لازمدی منه
وار تلاشیم هر نه که عشق ایستیوب تأمین اولا ایستورم لاله قانندان سینه عطرآگین اولا
من وطندن چخمادیم آهه شراره قاتماقا گلفروش کربلایم گلمیشم گل ساتماقا
امتحاندان چخسا میداندا بو عشقون سالکی شیرخوار اوفلوم اپلار سگیز بهشتین مالکی
زینبیم شش ماهه قربانه عیار اندازه له اللرین قونداقه باغلا دوشلوگینده تازه له
فاطمه روحیه سی وار سنده ای زیبا مقال چوخ بلایه تاب ائدوب دیندیر ربابون گوگلون آل
آه و حسرت خیمه سینده چوخ یاندیرما منی عشقیمون بازاری شیریندور یوباندیرما منی
چاتدی ئوز مقصودینه حاصل او پیر سخت کوش آخرین سرمایه سین آلدی اله گوهرفروش
جدول عشقه ائله برنامه تنظیم ایلدی مقتل کرب و بلایه کعبه تعظیم ایلدی
تا یتشدی مسلخ عشقه دایاندی بردبار یوز دوتوب جانانینه امر ائتدی ای پروردگار
مست عشقم ائتمرم بار بلادن من گله قابلیت سن وروبسن بنده ناقابله
بو او مقتلدور گلنمز مین مسیحا دم بورا ایستورم دامان عشقیمده نه وار سیلکم بورا
قاچمیان آل وئرچی ام من سود سرشار ایستورم بیر گلوموار ساتماقا خبره خریدار ایستورم
بو همان شش ماهه دور بیر گون یانار عالم بونا آختاروب بیر خیمه هاجر تاپمادی زمزم بونا
آلتی آی عمرینده درد و رنجیلن نورس لنوب بو او گلدور کی ربابون دامنینده بسلنوب
هر نجه سئوسون بویور اصغرده ورسون یار یار آل گلی مندن خدایا شیعه نی اوتدان قوتار
ناگهان سس گلدی ای بامنزلت استاد عشق چکمه غم حورا سنه سویلور مبارک باد عشق
گرم ائدن مرد عاشقه سودای بازاری منم قوزا الده غنچه وی قورخما خریداری منم
آل وئرون بیر شرطی وار صبر ایله افشا ایلیوم قوی بلشسون قانه اصغر من تماشا ایلیوم
ساقی محنتدن آل پیمانه مست باده اول حلق اصغردن ئوزون اوخ چکمگه آماده اول
تا فروشنده وئروب شرط خریداره رضا حرمله آتدی بیر اوخ قان آغلادی چشم قضا
باغبانون اللری اوسته گله سانجلدی خار دیسگنوب آچدی گوزین ائتدی تبسم شیرخوار
دل یوخیدی باخماقیلان یاره آندیردی سوزون سن علینون اوغلیسان نعمت بیل عشقون گوندوزون
اللرون وار عشق حقه فدیه وئردون جانیمی شرطیوی یاددان چخاتما گوللره سپ قانیمی
دشمسه هر دل سنون عشقونده دامه دل دگول من وئرن قان عشقوون بازارینه قابل دگول
سن کریم عشق سن قابل حساب ایله منی غنچه ده اولسام الونده گل حساب ایله منی
هر نه پیمان ایلیوبسن ایله اجرا تک به تک حالوه اشراری گولدورمه اوخی مردانه چک
مندن اتری یانما روحیم رخت آرامش گیور باشیم اوسته بیر خانم واردی منه لای لای دیور
مرغ جان شهپر آچوب گوگلرده پرواز ایلیه دی ربابه اصغری وردیم ننم ناز ایلیه
قتلگهدن رجعتون سخت اولسا اینجتسه سنی قونداقی قانلی بابا اخیامه قیترمه منی
پیر گلفروش و شش ماهه شیرخوار
غم قالانوب دللره یا فاطمه دهر دونوب محشره یا فاطمه
گلدی حسینون گنه یاس گونلری هامی دئیور یکسره یا فاطمه
گوگده ملکلرده دئیور یا حسین حسنی آچوب منظره یا فاطمه
کرب بلادن اوجالور نور عشق طعنه ورور اختره یا فاطمه
مسجد اولوب شیعیه ماتمکده شور توشوب منبره یا فاطمه
قاره علملرده بهشت عطری وار امت آلوب اللره یا فاطمه
زینبون عاشقلری غوغا ائدور غرق اپلوب اشک تره یا فاطمه
سینه ورانلار قره کوینک گیوب عشق دونوب محشره یا فاطمه
گرمیدی بازار ارادت خانم قاسمیلن اکبره یا فاطمه
سو سوزی توشسه دییروک الدخیل ساقی سرلشکره یا فاطمه
دیللرون امیدیدی عباس آدی عاشقوک اول سرپره یا فاطمه
وردی وارین ساتمادی مولاسینی دولت سیم و زره یا فاطمه
کوفه لیلر ساتدیلار انسانلیقی سیم و زر کافره یا فاطمه
آب روان که سنه کابینیدی وئرمدیلر اصغره یا فاطمه
نیمه نفس طفل زبان بسته نون توکدیله قانین یره یا فاطمه
دوشدی او دم عالمه جوش و خروش گل گتوروب قتلگهه گلفروش
شاه گوروب گرمیدی بازار عشق سسلدی ای ساکن دربار عشق
غنچه زهرانی گتوردیم ساتام کیمدی اپلا بوردا خریدار عشق
یرده که لر عاشقه سس وئرمدی غصه لنیب شاهد پرکار عشق
ناگه اودم گلدی ندا عرشیدن ای پسر عاشق کرار عشق
غنچه وه من مشتری ام مشتری من کیمی کیم واردی خریدار عشق برگ گل اوستونده بودور شرطیمیز سانجلا اوخ شکلیده بیر خار عشق
اصغروی سات منه گر راضی سن منده وئروم تجری الانهار عشق
فوری حسین سسلدی ائتدیم قبول اولدی سنون طفل لبن خوار عشق
منده ده بیر بیع و شرا شرطی وار یاز بونی تکمیل اولا طومار عشق
خاریله باهم گلی وئرم سنه ایلمرم ذره من انکار عشق
سنده بو قولی منه وئر یا کریم یانمیا نیراندا عزادار عشق
باغلادیلار آل وئره قول و قرار گلدی حسین باشلیا ایثار عشق
ائتدی عیان غنچه نی تا پرده دن آچدی کمان مردک اغیار عشق
اوچ پر اوخا وئردی زه اوسته مکان گتدی نشان تا جالانا ثار عشق
سانجلوب اوخ حنجر شش ماهیه آچدی گوزین کودک بیمار عشق
باخماقی تبریک ایدی پیوندینه محو ائلدی عالمی لبخندینه
وآلهیدی عاشق عالی جناب ایلدی ایثارینی حق ارزیاب
گوردی ندا گلدی گینه عرشیدن عشقوه احسن دئدی مالک رقاب
غنچه بوغازیندن حسین تیری چک روضه جنتدن ائله فتح باب
ساخلاما مقتلده بو شش ماهه نی حور و ملائکدن آلور صبر و تاب
بیلدی حسین راضی اولوب مشتری بال و پر آچدی پسر بوتراب
چکدی اوخی سسلدی یا فاطمه قویمادی دلدار منی بی جواب
یدی گوگه ناز ائلیور اصغریم سرسبد گلشن اولوب انتخاب
ائتدی هوس بیر اوپوشه پیر عشق باخدی سولان اولدوزینا آفتاب
اوخ یرینه قویدی یانان لبلرین بوشدی یرون بوردا دئدی آی رباب
لحظه لرین بیلدی غنیمت حسین گل بوغازیندان اله آلدی گلاب
سپدی اونی گوگلره سسلندی هو گوندرورم محضروه خون ناب
بو قانی قیترمه یره یا ودود پایلا ملک لرده آپارسون ثواب
لطفووه مدیونم الهی سنون یاندی بالام اولدی دعا مستجاب
بسیار عالی التماس دعا
محتاج دعا حاجت ها روا انشاالله